Cufal jakich niywiela: widza na Facebooku ôgłoszka, że je robota. Trza, coby kery zajechoł do Dublina na Uprise Festival – taki torg, kaj start-upy (tako zorta sztartujōncej firmy) mogōm wystawić swoje sztandy. Dlo mie bojka, tōż biera to. Rajza do Irlandie we środa, tyn cołki fajer we czwortek, a w piōntek z rana już nazot (potym trza było jeszcze zaro z fligra ciś busym na drugo zmiana do roboty tej normalnej, kero mōm na beztydziyń). Tōż do kupy miołech kole 6 godzin na zwiydzanie. Niywiela, ale lepsze to jak nic. Kapka liznyć miasta szło.
Dublin to niy ma wielo stolica. I chocioż autobusy z wiyrchym skwolōm, to wszyjsko idzie ôblyź piechty. Trasa miyndzy krasikōniami z mapki, kero samek mocie, to kole 8 km do przeleziynio. Szafniecie i we dwie godziny, ale niy rekōmanduja. Lepij mynij, a po leku. Sōm banuja, że żech w poru gryfnych i wożnych sztelach niy bōł. Jedne pozawiyrane, a ô inkszych żech ani niy wiedzioł, boch sie do tej rajzy dobrze niy prziszykowoł. Tōż niy rōbcie jak jo, yno fajnie sie przirychtujcie. Chocioż… jo miołech na te miasto yno dwa cweki: udany wander i rychtyczny Guinness. Tela. Tōż i wycieczka udano 😉
Ô stawiyniach, chałpkach i pōmnikach w Dublinie mōgbych sam szkryflać i bez godzina, ale za wiela to synsu ni mo, bo sōm musiołbych przōd poczytać encyklopedyje i inksze blogi, a dyć to umicie se znojś sami. We plac tego szrajbna Wōm co wiym, co udało mi sie kajś tam wyczytać abo wypytać kamratōw przed rajzōm. Tōż mōm dlo Wos piytnoście dorad, knifōw i wiadōmości ô irlandzkij stolicy. No i jak już na isto uwidzieliście – tradycyjnie – masa bildōw.
Knify, dorady i wiadōmości dlo wrazidlokōw
Historyczno-informacyjno piōntka
1. Dublin postawili Celty, ale za poczōntek miasta uznowo sie rok 840 w kerym norweskie Wikingi postawili se tamek swoja kolōnijo. <- To była ôstatnio tak cniwo informacyjo w tym tekście 😉
2. Na całym świecie yno Irlandia mo insztrumynt za marka narodowo. Je niōm harfa, kero sztyjc je trzimano we dublińskim Trinity College.
3. W Irlandii naprowda godo sie po irlandzku, a niy yno po angielsku (chocioż wiynkszość ludzi tamek i tak rozprowio yno w tym drugim jynzyku). A napisy po irlandzku wyglōndajōm jak w jakijś bojce, forgot. “Włodca Pierszczyni” abo co. Bajszpil: Dublin to je Baile Átha Cliath.
4. Ale! irlandzko godka je dziepiyro trzecim jynzykiym, kerego używajōm we krasikōniowym landzie. Drugo je godka… polsko.
5. We Irlandie je kole 120k Polokōw. Tōż tak, choby cołki Rybnik tam ôroz wywiyź. A i pōłek z tych 120 tauzynōw miyszko w Dublinie.
Echt wożno piōntka
6. Irlandery naprowda sōm ryszawi. Bezma 6.5% z nich mo wosy jak wewiōrki. 6.5% to nic? Statystycznie znaczy to, że w klasie, w kerej je 31 szkolorzy, dwōch na zicher bydzie ryszawych!
7. Jak sie Wōm trefi lecieć fligrym Aer Lingus, to na isto posuchocie se znanych rockowych pieśniczek. Podwiela swōj “wystymp” napocznōm stewardessy, U2 leci w zielōnej maszynie nōn-sztop. Z Irlandie sōm i ôni, i Sinead O’Connor.
8. Guinness ze sklepu w biksie, a guinness w irlandzkim szynku to je blank inksze piwo. Forgot. Te piyrsze pije sie z ciynżkościōm, druge z uciechōm.
9. Irish coffee sprōbować musicie. Yno spamiyntejcie, że to ni ma nojlepszo kawa do śniodania. 😉 (I trza mieć skōńczone 18 lot!)
10. A i guinnessa, i Irish coffee leko znojdziecie. W samym Dublinie je przeszło 600 szynkōw.
Praktyczno piōntka
11. Wszyjsko co je nojlepsze w Dublinie (fajne parki, Grafton Street, Trinity College, St. Patrick’s Cathedral, Guinness Storehouse) znojdziecie na południowej zajcie miasta. Tōż jak już wiycie, że bydziecie mieli niywiela czasu, to kuknijcie za hotelym gynau tam.
12. Dublińsko flughawyna je yno 10km ôd miasta, tōż autobusym zajedziecie na nia w mynij jak pōł godziny. Nojtōńsze farkarty za 6€.
13. Miyndzy 15:00 a 17:00 do autobusa niy siodejcie. Ształy take, że szok.
14. WiFi je wszyndzi. Przi drōgach, w autobusach, na lotnisku, w szynkach. Luksus.
15. Bajszpile cyn: ajnfachowo farkarta autobusowo 2€, Guinness w szynku 3-5€, dobre burrito 6-7€, jeszcze lepszy burger 10-12€, kawa ajnfachowo 1-2€, kawa irlandzko 6€, wielo sznita + zupa 6-7€, brifmarka 1.1€, szkartka pocztowo 0.4€, magnes z zielōnym chopkiym i krauzōm pijyndzy 3.5€.
Jodło w Dublinie
Tukej musicie zjeś: Gourmet Burger Kitchen – kapka drogo, chocioż jak na warunki “europejskie” to bez tragedie. Jedyn z nojlepszych burgerōw, jakie jodłech (a zjod żech już ich naprowda fol). Pablo Picante – burrito je tam richtich chutne, ale to, jak tyn lokal je wyrychtowany, to je dziepiyro miazga.
Tukej tyż możecie, ale już niy musicie: Mexico to Rome. To już normalno restauracja – kelner, menu itd. No niy moje klimaty. Ale na proszōne wieczerze sie niy psioczy, tōż szrajbna yno tela, że Surf’n’turf w smaku dobre. Kole 20€ za talyrz.
W irlandzkij stolicy znojdziecie masa piekorzy, kawiarni, szteli ze sznitami z bajlagōm i inkszymi zestawami “lunchowymi”. Za 5-6€ już spoko pojycie.
Spanie w Dublinie
Społech w Hotel Dergvale, ale niy biercie tego. Bedynōng super, śniodania i miyjsce tyż, ale za tak ciasno izba sōm ze swoich bych 130€ za dwie nocki w życiu niy doł. A spać je w Dublinie kaj. Standardowo – wejrzijcie na Airbnb i Booking.
A i kuknijcie na crib.ninja! Skirz tej zajty bōłech w ogōle w Dublinie i ô nij żech tam rozprowioł. Sprzido sie fest kożdymu, kery sznupie za nowōm izbōm, miyszkaniym abo chałpōm.
Co by sie zdało samek dociepać? Jak znocie Dublin, to pōmogejcie. Bydzie dlo inkszych i dlo nos, jak zaś tam zajadymy. A wybierymy sie na zicher! 🙂
