Nojlepsze a nojgibsze wygańskie ciasto szekuladowe

przez Julia Sebastian
Wegańskie ciasto czekoladowe - bele kaj - blog po śląsku

Lubiymy maszkecić. Fest. A już jakiś czos w zocy mōmy bardzij taki futer, kery rychtuje sie bez sztofu ôdzwiyrzowego – maszkecymy zaôbycz to, co urosło z ziymi. Czynsto słyszymy, że wygańskie jodło abo wartko sie mierznie, abo trza sie przi nimu fest narobić. To sōm farmazōny, tōż coby to wyklarować, roz za kedy podciepnymy Wōm tukej recept, a Wy sami zmiarkujecie ali krōm miynsa, jajec a mlyka je tak cniwie a ciynżko, dobre?

Ôkrōm tego, ciynżko je terozki znojś we internecy wygańskie recepty po ślōnsku, tōż bydzie tyż przileżytość ku ôdfryszniyniu naszych ślōnskich dykcjōnorzy, pra? A jak bydziecie chcieli poczytać po polsku, to ajnfach klupnijcie w te farebne kōłko na wiyrchu po prawej. No i na mus kuknijcie na nasze piyrwyjsze teksty ô warzyniu – wygański ôbiod niydzielny a na dycht wygańsko krōlowo wszyjskich zup.

Dzisiej recept na nojleksze do narychtowania wygańskie ciasto szekuladowe. Czamu “ciasto”? Bo niy ma to ani zista, ani powidlok, ani kołocz, ani tyż binsztych, ale mo po trochu dobroty z kożdego śnich. Perfekt sie sprawdzo, jak chned majōm przijś goście bez przepowiydzi (na przikłod tacy, kerzi niy śmiōm jeś laktozy) abo jak Twōj drugi pōłek dopōmino sie ô cuker. Darymny futer sznupać w tym cieście za jajcami abo mlykiem (bai flancowym) – idzie je wyônaczyć jak w kilszranku prōznota. Starczy 30 minut, jedna dziyżka a bratruła rozgrzoto do 180 gradōw. Sprōbujcie sami, a przeświadczycie sie, że to richtich je nojgibsze a nojlepsze wygańskie ciasto szekuladowe!

Nojleksze wygańskie ciasto szekuladowe – skłodniki

  • 1.5 szklōnki mōnki pełnoziornistej (ajnfachowo tyż sie zdo, bydzie yno “mynij fit”)
  • 0.5 szklōnki brōnotnego cukru
  • 3 łeżki kakała
  • 1 łeżeczka zody
  • szczypet zalcy
  • 1 szklōnka wody
  • 1/3 szklōnki ôlyju
  • 2 łeżki ôblubiōnego ôblubiōnego dżymu
  • idzie tyż dociepać: gorść ôblubiōnych ôrzechōw, suszōnych ôwocōw (u nos ôrzechy italijskie, żurawina a nasiynia goji)

Nojleksze wygańskie ciasto szekuladowe – rychtōnek

W srogij dziyżce miyszōmy łeżkōm wszyjskie suche tajle (uff, niy trza wyciōngać miksera!). Dociepujymy woda, ôlyj, dżym a nasze ôblubiōne ekstra kōnski. Miyszōmy, coby skłodniki sie pokuplowały a wylywōmy na blacha do pieczynio (przōdzij trza jōm leko popryskać ôlejym). Naszo tortownica idzie do piekaroka nagrzotego do 180 gradōw na 30-35 minut – do suchego patyczka. I to by bōło tela.

Wegańskie ciasto czekoladowe - bele kaj - blog po śląsku

Jakeście uwidzieli, narychtowanie ciasta bez mlyka, jajec abo masła je możne, nie wyczyści nōm portōmela, a ku tymu umi być przijymnie lekie. Te wygańskie ciasto szekuladowe zawdy sie udowo, bai jak fto blank niy mo grajfki do warzynio. Na jesiynne wieczory (kere już chned), na drugie śniodanie abo “ku kafyjowi” bydzie perfekt. U nos Matis umi zmłōcić zaro cołko blacha, ale możnej Wōm sie udo ôstawić chocioż kōnszczek na nastympny dziyń?


Szafliście? Smakowało? Mocie inkszy recept na gibkie a ajnfachowe wygańskie maszkety?
Podciepej inkszym czytelnikōm we kōmyntorzu na FB – klik!

Inne interesujące teksty:

Ta strona używa ciasteczek oraz zewnętrznych skryptów dla lepszego dostosowania treści do użytkownika. W Polityce Prywatności znajdziesz informacje o tym, jakie ciasteczka i skrypty są używane, oraz jaki wpływ mają na twoją wizytę na stronie. W każdej chwili możesz zmienić swoje ustawienia. Nie wpłynie to na twoją wizytę na stronie. OK Polityka Prywatności