Mocie czasym taki śniczek kajś ze zadku łepy? Ô kerym niy myślicie za wiela, ale jak je przileżytość, coby je spełnić, to sie trzynsiecie jak pies przi wōszcie? Takim moim śniczkiym bōł byzuch na Estadio Santiago Bernabeu – cyntrum Realu Madryt, nojwiynkszego klubu fusbalowego na świecie. Bylimy tam! 🙂
Bernabeu Tour – kasa
Przijymność łażynio po Bernabeu to – jak sie już w Madrycie je – utrota 100zł. Myśla, że jak za spełniōny śniczek, to sie werci. Inkszo sprawa, że w takich mōmyntach sie niy szporuje. No i sama Julia pedziała żebymy poszli! :O
- 3.2€ transport (tam i nazot metrym z cyntralnego przistanku Sol pod same dźwiyrze stadiōnu)
- 19€ ajntryt (ni ma zniżek dlo sztudyntōw)
Rajza po stadiōnie je bez ôprowadzocza. Turystōw we cołkij hiszpańskij stolicy za wiela niy było, tōż i na Bernabeu tyralimy bez presy. W rajach my niy stoli – ani po ajntryty, ani coby już wlyź do strzodka. Rundka po cyntrum Realu je policzono na 1.5h. Nōm zleciało kapka wiyncyj – jak wdycki – skuli bildōw. Tam trōwka, tukej tōra… Niy szło gibcyj skōńczyć.
Bernabeu Tour – plan
We planie wycieczki je siedym wożnych przistōnkōw:
- Stadiōn z wiyrchu – panorama ze nojepniyjszego punktu stadiōnu, leko idzie aparatym chycić cołkie trybuny.
- Izba “nojlepszego klubu świata” (take miano) – multimedialne prezyntacyje, filmiki i nojgryfniyjsze tōry bez pauzōw. Na drugij zajcie stare koszulki, bale i sztrzewiki ze handszriftami m.in. Raula, Di Stefano, Zidane’a.
- Historyjo nojnowszo – złote bale i sztrzewiki (nagrody dlo nojlepszego fusbalera i lojfra sezōnu w Europie) ôd Zizou i Owena, Raula i Figo, Ronaldo i Ronaldo plus mega prziszykowane kōmputerowo statystyki teroźnych szpilerōw – sprinty na mecz, udane fiksy, ôdebrania, asysty itd.
- Film zmōntowany z kōnskōw akcyji meczowych z godkōm szpilerōw – tyngi, sklejōny pod ymocje (szlagi serca we tle i epny triumf na kōńcu). Ku tymu Bynzyma, Pepe i Casillas ôdpowiadajōm na pytanie “Czym je dlo ciebie szpilanie w Realu Madryt?”.
- Trybuna VIP – dobro sztela do zaglōndanio, bo gynau na strzodku. Stołki ôbite skōrōm. Tela.
- Szatnie i tunel – szranki z nazwiskami poustawiane podle numerōw na koszulkach, a dalij drōga na szpilplac (goście i godpodorze ôddzielyni gitrōm).
- Banki dlo rezerwowych – niy dziwia sie ani trocha Jorgowi Dudkowi, że sie pisoł na zicanie tam bez pora lot. Na takich to i posiedzieć gryfnie.
Po drōdze jeszcze dwa photo rooms – pozujesz ze ścianōm, a ôni doklejajōm Cristiano Ronaldo kole Ciebie i sprzedujōm za pora ojro. Słaby patynt z rōmli i inkszych parkōw rozrywki. Liczyłech, że w takim miyjscu niy bydōm sie wygupiać.
Wiadōmo, nojlepij by było wejrzeć na mecz. Z Barcelonōm, Atletico abo Walyncjōm. Ale skuli Rayo, Getafe abo Las Palmas tyż byłbych rod. Ale meczu żodnego niy było. Na szczynście. Chyba musielibymy jeś suche żymły i popijać luftym bez nastympne dwa miesiōnce. A szkoda by było, bo już czekoł na nos dorsz, świńskie uszy, francesinha i szekulada z wiśniami w gorzole. Starczyło chycić auto i przejechać 630km.