Ciasne drōgi, ōmy wele dźwiyrzy, spodnioki na sznurze nad łepōm – kaj to? Na Alfamie – jednej z nojgryfniyjszych dziylnic Europy.
Idzie zatrzimać sie w czasie, trza sie yno tam stracić. Z wiyrchu zaro wejrzy na Wos starka i samymi ślypiami sie spyto “co ôdy mie chcecie?!“. Kole nos bydzie stoło auto wyprodukowane w latach ’70 z fotelami jak z salōnu i amortyzatorami jak ze złōmu.
Pamiōntki? Yno z Alfamy!
Je tyż masa nowoczesności – małe sklepiki z ryncznie rychtowanymi portōmelami i taszkami z korka. Koszulki z żōłtym tramwajym, fadistas ze łzami w ôczach abo kokotym. Znojdzicie tukej kożdo pamiōntka i je szansa, że kupicie jōm niy ôd hinduskigo Amira jak w kożdym inkszym miyjscu Lizbōny, a ôd Portugalki ô imiyniu Maria. Dejcie ojro wiyncyj, spōmōżcie lokalny handel 😉
Dobre murale yno w poru miyjscach. Za to jak już sōm, to rychtyk mocne.
Feira da Ladra
Jeszcze à propos handlu – je przi Alfamie coś takigo jak Torg Złodziei (Feira da Ladra). Miano sie wziyno z historii i jasne, że sprzedujōm tam tyż kradziōne wichajstry mōmy nadzieja, że yno skuli tego dalij sie tak na tyn torg godo. Kedyś plac z niylygalnymi interesami, dzisioj ôpcja full-legal jak trza Wōm starych nyjmaszyn, poklejōnych szczewikōw abo kōnskōw kafelek z chałp z cołkij Portugalii. Yno we wtorki i soboty.
Nastympno rzecz po praniu, kero ujrzycie w bezma kożdym ôknie Alfamy to kwiotki. Po nich idzie sie kapnyć czy w danej chałpie dalij keryś miyszko.
Dźwiyrze, kafelki, pōmniki i… tuk-tuki. Tymu wszyjskimu sie przijrzyjcie, bo idzie sie fol nauczyć i pozaglōndać na życie rychtycznych Portugalczykōw, a niy jakiś podrobianych 😉 No a te małe autka to kole moplikōw nojwygodniyjszy strzodek transportu pod alfamowskie (?) gōrki.
Castelo de São Jorge
Na kōniec – zōmek! Castelo de São Jorge ciepnie sie w ôczy bezma z kożdego punktu w portugalskij sotlicy. Tōż my go zostawili na ôstatki. Same stawiynie niy zrobiło na nos wiynkszego wrażynia, ale landszaft stamtōnd to je masakra. Beztōż na kōniec “kapka” wiyncyj bildōw z tej szteli 😉
