Jedne z nojbogotszych miast we Portugaliji, 30km ôd Lizbōny, gynau przi ôcyanie. Za staryj piyrwy miyszkały tamek m.in italijsko i szpanijsko familijo krōlewsko. Wszyndzi naôkoło masa dobrych knajp ze fajnie wōniajōncym jodłym i pora piyknych plaż ze snożnym pioskiym. Baza wypadowo do portugalijskij stolicy i ku Cabo da Roca. Dzisioj krōtko ô Cascais.
Jak siedniecie do cuga na banie Cais do Sodré we Lizbōnie, to za jakeś 40 minut bydziecie już na miyjscu (kole 2€ w jedna zajta). Po drōdze miniecie jeszcze sagoczy na plażach w Carcavelos i Estoril – werci sie tyż wylyź i potōnkać jak mocie za tela czasu. Ludzi je tamek zawdy fol, ale placu je jeszcze wiyncyj, tōż bez strachu.
Ô Cascais idzie pedzieć, że je to taki szykowny, luksusowy kurort.
Nojpopularniyjsze szporty? Golf i żeglarstwo.
“Oferta dnia” we restauracyjach? Ôwoce morza.
Łōżko na jedna noc we hostelu? We jakim hostelu?
Ale to za bardzo ni ma wożne przi zwiydzaniu, pra? Bele by było na co pozaglōndać, kaj se fajnie zicnyć, pocykać zdjyncia. A takich szteli w Cascais pora je.
Ze kōnkretnych placōw do ôbejrzynio je Boca do Inferno i Palácio de Conde de Castro Guimarães. Reszta dnia tamek to bardzij łażynie ciasnymi drōgami i wybrzeżym, maszkecynie i kukanie na pōł-sagie dziołchy rajzowanie na kołach (kere bezmaś idzie se pożyczyć za fraj). Same miasto piykne, idyalnie pasuje na nidzielny szpacyr.
Miano Boca do Inferno wziyno sie ze tego, że jak bałwōny walōm we wyônaczōny klif, to słychać “ôdgłosy piekła”. Ôcyan chce sie wciś we kōntynynt i beztōż wyrzazoł tako mało zatoczka. Szału ni ma, ale zol je tamek fajny – idzie se wkryncić, że sie łazi po Marsie abo po Miesiōnczku. 😉
Przi dwōch miesiōncach życio we Lizbōnie, jedyn dziyń we Cascais zdecydowanie “na ja”, ale tela starczy, bo chocioż wyglōndo naprowda gryfnie, to za wiela do roboty tam ni ma. Chocioż… możnej za pora(dziesiōnt) lot bardzij bydymy wożyć takie miyjsca. 🙂
