Co to je LxFactory? Czamu o tym szkryflōmy?
Je rok 1846. Gynał postawili i ôtwarli, jak sie potym pokoże, nojważniyjszo w lizbōńskij historii sztela produkcyjno. W dziylnicy Alcântara, na placu wielim na 23k m2, stanyło cyntrum industryji – Companhia de Fiação e Tecidos Lisbonense.
Bez 170 lot szwoczki w portugalskij stolicy niy musiały sie boć ô robota, bo do fabryk klamotōw brali kożdo baba, kero se radziła z myjtermasym w rynce. Tela, że po tych wszyjskich lotach miasto zawarło ôstatnio fabryka.
Je rok 2007. Kōnszt drōgi wyloł sie na postindustrialne mury. Legalnie, na ôczach klary, w samym strzodku dnia. Synek, kery fest downo niy widzioł sie z balbjyrzym, a na szłapach mo dziurawe galoty sfiniynte à la woda w pywnicy, szkryflo sagigo Adama z kōnskiym astki na cymboliku luliku kroku. Kole niego dwie dziołchy sprzedujōm mycki z napisym YOLO. Cyntrum lizbōńskigo hipsterstwa oficjalnie ruszyło.
Galerie z bildami i biura projektowe. Eko-łachy, eko-zisty i eko-tyj. Graffiti, kosmiczne szranki, kolor, zabytkowe nyjmaszyny.
Je rok 2015. Para ślōnskich sztudyntōw kōmbinuje co w tym LxFactory idzie porobić. Po cimoku – wieczerzo w Kiss the Cook, za jasnoka – sznita i koło z BI+CA? Abo ryczka ôd Alm&Rich, a potym nowe, wegańskie (!?) szczewiki w nae? Kożdy znojdzie coś dlo sia. Je z czego ôbiyrać, bai jak kery je fest wymyślaty.
Perełka? Ler Devagar. Coś miyndzy akadymiōm Pōna Kleksa a Hogwartym Harrego Pottera. Bicherszranki dookoła, ale sztyjc masa placu. Ksiyngarnia jasno i snōżno – ściałoby sie tam miyszkać. Tak jak i w kożdym inkszym miyjscu w LxFactory. Mocie wiyncyj jak trzi dni w Lizbōnie – jedziecie tam!
