W portugalskij lidze fusbalu tak po prowdzie geltujōm yno trzi ekipy: FC Porto, Sporting i Benfica Lizbōna. To gynał tak, jak w lidze polskij (Grubiorz Zabrze, Piast Gliwice i Ruch Chorzōw) i w rybnickij A-klasie (Flama Ochojec, Piyrszy Chwałowice i Grubiorz Boguszowice). Stadiōn w Porto już żech widzioł, na meczu Sportingu bōłech, tōż w te feryje wziynech Julie pozaglōndać na Gaitána, Luisão i Mitroglou w czerwōnej czynści portugalskij stolicy.
Dojazd na Estádio da Luz
Na Estádio da Luz zajechać idzie roz-dwa, starczy wlyź bele kaj do metra i wylyź na banie Alto dos Moinhos. Bajszpil: z cyntralnej szteli Baixa/Chiado trza yno znojś modro szlajfka metra i w 25 minut bydziecie pod tōrōm stadiōnu.
Bilety na Benfica
Ajntryt kupicie w dziyń meczu – nasze kosztowały po 16€. Jak na znany europejski klub ni ma źle, ale za to zice mielimy fōrt ôd szpilplacu. Idzie to dostać łacnij, ale trza znać jakigo fyrajnisty z kartōm kibica. My niy znodli. Dejcie pozōr, niy idzie płacić żodnōm kartōm (raja do bankōmatu na godzina stocia)! Jakby tak już ajntrytōw niy bōło, to ni ma sie co starać – idzie chocioż zrobić zakupy w Media Markt, kery je tajlōm stadiōnu 😉
Kibice i futer na Estádio da Luz
Na meczu gynał 53285 kibicōw (z tego kole 45 na żōłto, tych z Estoril). Cołkie familije, dobry doping, ryki w fajnym stylu – myśla, że felōnili po portugalsku tak samo, jak to u nos je na meczach, ale jak sie tego niy rozumi, to mo to klang choby znajōme Ach, jak cie chyca (Ai Se Eu Te Pego).
Coby rychtyk poczuć sie kibicym takim na 100%, Julia wcisła jeszcze bifana i zapiła piwym z plastiku 😉 Kożdy stadiōnowy ōpa jy tam tako wieczerzo! (A i jak już je przileżytość – trocha podōnaczyłech pora bildōw, bo skuli meczu zapōmniołech cyknōnć jake gryfne tej mojij dziołsze…).
Na gole musielimy poczkać bezma pōłtora godziny, ale jak już wpod piyrszy, to w nastympne 15 minut Benfica klupła jeszcze trzi.
Pod spodkiym wciepuja składy, strzelcōw i pora inkszych pierdōł – tak, coby sie poczuć bez chwila jak szportowy dziynnikorz 😉 Jakbyście chcieli jaki mecz ôbejrzeć na żywo, a niy wiycie jak sie za to zabrać i chcecie coby my Wōm tako fusbalowo rajza narychtowali – dejcie znać, na poru gryfnych stadiōnach już my szłapy stawiali 🙂
Estádio da Luz, szesnosty siyrpnia ‘15, pōł dziewiōntej na wieczōr
Benfica Lizbōna – Estoril Praia 4:0
kibicōw: 53285
gole: Nélson Semedo (89′), Jonas (81′, 78′), Mitroglou (74′)
Benfica: Cesar – Semedo, Luisao, Lopez, Eliseu – John, Fejsa, Pizzi, Gaitan – Jonas, Mitroglou
Estoril: Kieszek – Anderson Luis, Santos Silva, Tavares, Mano – Taira, Monteiro Macedo, Seba, Leandro, Chaparro, Gerso, Lohner – Bonatini
