Los Angeles: Beach, please!

przez bele kaj
Venice Beach, Kalifornia, Los Angeles, USA - bele kaj, blog podróżniczy po śląsku

Ani Hollywood, ani Beverly Hills nos za serce niy chyciło. Tōż kożdymu, fto nawiydzo Los Angeles doradzōmy, coby nojwiyncyj czasu przesiedzieć przełazić fōrt ôd miasta, we blank inkszych sztelach jak te dlo gwiozd i celebrytōw. Pōdźcie lepij na sztrand – na Hermosa i Venice Beach!

Hermosa Beach

Na Hermosa Beach trefilimy bez cufal. Sznupalimy za hostym we Los Angeles i gynau tamek nos ciepło. John sōm do nos szrajbnył, jak yno wciepalimy informacyjo ô tym, że niy mōmy szteli do nynanio we “Mieście Anniōłōw”. Z poczōntku medykowalimy se, że Hermosa je fest daleko ôd wszyjskich miyjskich atrakcyji. Niyskorzij kaplimy se, że to L.A. je fōrt ôd takij cudnej atrakcyji jak Hermosa. Dostalimy swoja izba, mielimy pokōj, dwie minuty do sztrandu i dwie deski do surfowanio. No bojka.

Sztyjc Los Angeles, ale już bardzij jak taki urlopowy kurort. Starziki, turyści i surferzy, ale ci “mynij wysztiglowani”. Ci, co lepij se już radzōm ze welami, cisnōm na Venice. Na Hermosie je cicho bez dziyń i kapka wiyncyj larma po cimoku. Pojeś, legnyć se, smolić robota i sztudia – to my tamek ôpanowali do perfekcyji.

Surfowani – nauka spory i pokory

Surfing niy ma łatwy. A taki sie zdo, jak wejrzicie na tych wszyjskich ôpolōnych ludkōw, kerzi cisnōm po welach i wywijajōm roztōmaite triki. Ustoć na tym pierōństwie je biyda, forgot. A co tam ustoć, ciynżko to sie w ogōle pływie ze tōm deskōm szczypiōnym do szłapy! Ale richtich je w tym cosik magicznego. Sce sie stować po kożdym szlagu i prōbować zaś i zaś, i zaś…

Venice Beach

Sōmsiodka bardzij hyrsko. Venice Beach to je klasyk, hit, cudo i perełka! Bohatyrka masy filmōw i teledyskōw, kero – gynau jak Katedra we Mediolanie abo autobus ze Sosnowca do Katowic – retuje miasto we ôczach turystōw. Venice Beach niy yno uratowała Los Angeles, ale tyż ôstała sztelōm, do kerej fest chutnie cisnymy nazod. Terozki już yno na ôbrozkach, ale sztyjc.

Zrobilimy tamek zakupy! Spōntaniczne, pod wpływym klary, piosku i dobrego jodła. Skuli farebnych ludzi i pakerni Weidera. Tōōōż… mōmy swoje wyśniōne deski!

Ale Venice to niy yno geszefty i duuugo, gryfno prōmynada. Idze i fajnie pomaszkecić, wejrzeć na “nojdziwniyjszych ludzi świata” i dostać pora skryntōw. Naturalnie i lygalnie – u doktōra, na recept.

Kōniecznie trza we tej tajli Los Angeles doczkać do zachodu klary, podziwać sie na triki na kołach i deskorolkach choby ze “Grinda” abo “Lords of Dogtown”, potrynować na spōmnianej pakerni i sie potōnkać. A potym ciiiś szpecjalnōm sztrekōm dlo kołōw aż ku nastympnymu cudnymu miyjscowi, ku Santa Monica!

Nawciepujcie nōm skirz tego tekstu na FB!
Kōmyntowanie, lajkowanie i podowanie dalij je fest fajne 😉

Inne interesujące teksty:

Ta strona używa ciasteczek oraz zewnętrznych skryptów dla lepszego dostosowania treści do użytkownika. W Polityce Prywatności znajdziesz informacje o tym, jakie ciasteczka i skrypty są używane, oraz jaki wpływ mają na twoją wizytę na stronie. W każdej chwili możesz zmienić swoje ustawienia. Nie wpłynie to na twoją wizytę na stronie. OK Polityka Prywatności