W ôstatnim poście ô Lizbōnie napisalimy, że okrōm miradouros je jeszcze pora szteli, z kerych landszaft tyż je rychtyk gryfny. Dzisioj chcymy Wōm pokozać jako wyglōndo portugalski świot ze znōmych aufcugōw i inkszych placōw.
Aufcugi
We stolicy sōm cztyry: Gloria, Bica, Lavra i Santa Justa. Podwiela nos poprowicie – te piyrsze trzi to tyż aufcugi, chocioż wyglōndajōm bardzij jak kolejki funicular. Idzie cyknōnć fajne bildy i prziszporować czasu. Bo chocioż te żōłte wagōniki jeżdżōm na krōtkich trasach, to Wasze szłapy i tak fest dychnōm – gōrki miyndzy przistankami Biki, Glorii i Lavry sōm pierōńsko spadzite. Rajza w jedna zajta – jak za metro i autobus – 1.25€ jak kupicie se farkarta pryndzyj. Za 3.60€ zajedziecie tam a nazot jak kupicie dziepiyro u kerowcy.
A i niy czekejcie na snożny, rychtyk żōłty wagōn. Wszyjskie sōm umazane skuli graficiorzy 😉
Santa Justa
“Nojbardzij windowo z wind” – te zdanie nojlepij pasuje do Santa Justy. Nojwiynkszy plus? Stoi gynau w samym strzodku miasta.
Lavra
Nojmynij popularny z żōłtych aufcugōw, chocioż to prawie Elevador do Lavra je nojstarszy w mieście. Kupluje drōga Câmara Pestana z Largo da Anunciada.
Bica
Tukej mōmy nojwiyncyj zdjynć. Bica to masa turystōw, dobro lokalizacyjo i nojgryfniyjszy landszaft. Ciśnie miyndzy Calçada do Combro i Rua de S. Paulo.
Gloria
Skiż tego, że kupluje Praça dos Restauradores z Miradouro de São Pedro de Alcântara, to pōmogo w zwiydzaniu nojbardzij. Przejedziecie Gloriōm fest dugo i spadzito drōga. Z ôkna wejrzijcie na farebne murale.
Pōmnik Ôdkrywcōw
Pamiyntocie Padrão dos Descobrimentos z Belém? Tyn epny kōnsek kamiynia z da Gamōm, Magellanym i Hyniym Żyglorzym? No, tōż sōm wiyrch tego pōmnika to tyż przileżytość do wejrzynia na miasto z jeszcze inkszyj zajty. Niy robi fest wieligo wrażynia, ale fajnie je kuknōnć na Torre de Belém z daleka.
Parque Eduardo VII i Praça do Marquês de Pombal
Plac, park abo rōndo? Lepsze do lotania, cykania zdjynć abo łażynia z psym? Zielōny teryn, kery ujrzicie i z miradouros, i z aufcuga Santa Justa – i fest bydziecie chcieli tam zōnś. Gynau pod rōndym je jedyn z wiynkszych przistankōw metra, tōż niy trza ani ciś piechty. A jak kōmu chybio tryningōw w czasie rajzy, to idzie tamek zrobić pora podlotań pod gōra i poczuć pod wieczōr, że dalij sie mo kita 😉
Zōmek Św. Jorga
Ô nim tyż już czytaliście, ale niy idzie ô go niy spōmnieć jak sie rozprowio ô landszaftach.
Park “Przi Chałpie”
Abo mōmy taki cufal, abo dobrze umiymy szukać, bo okrōm miradouro przi chałpie mielimy tyż „swōj” park. Keby Jardim da Alameda Dom Afonso Henriques (pierōna jake dugie miano) bōł trocha bliżyj Tagu, to na isto godałoby sie ô nim jak ô jednyj z nojwiynkszych atrakcyji miasta. A tak? Żodnego z aparatym, synki szpilajōm w fusbal z tōrami zōnaczōnymi z rukzakōw, a baby lotajōm naôkoło trownika, coby ściepać trocha fetu. Hm, tōż mono tak je lepij?
