Tak ja my ôbiecowali – drugo tajla bildōw ze Amsterdamu z całōm masōm nowych wyrozōw. Poczōntek “zolytōw we stolicy Holandiji” znojdziecie samek: Amsterdam ôd A do L.
M
Niy lyźcie do piyrszej, bele jakij knajpy. Chyba, że chcesz dostać morziska. Frele lubiōm mekrować i robić machy, tōż trza bydzie trocha poszukać, zanim znojdziecie jij ulubiōno rolada z mandlami. Miglanc, niy śmisz tego maścić!
N
Po drōdze trefi sie jaki nagaty, naprany najduch. Jak coś powiy do tej Twojij, to możesz mu nazdać, ale niy za fest!
O
Prask! Inkszy ôżarty niy ôbstoł i sie ôbulił gynał przi Twoich szłapach. Tymu toś już padoł wszyjsko. Że je ôszkliwy, że pierōn i jeszcze masa inkszych wyrazōw. Dziołsze sie to niy podobo. Opa i ōma wele Ciebie yno zaglōndajōm jak Ci dziołcha pito…
P
Przeca niy Twoja wina, pra? Tera już po ptokach. Ni mosz sie ani co przichlybiać. Pakernyś je, tōż jeszcze baba trefisz.
R
Niy być rojber i niy rubnij. Tak, co rzić w galotach zmieścisz. I rzykej. Rzykej chopie, bo nic Ci inkszego niy ôstało…
S
No chyba, że sagie baby w Red Light District. Niy namawiōmy, ale je ich tam masa. Kożdo mo swōj szaufynster. Porozprowiać se w “cztyry ôczy” może i siedlok, i bele smark. Niy wiymy yno czamu te baby tam sie seblykajōm, ale szczewikōw żodno niy sebuwo…
T
Toć, dlo 98% ludzi RLD to je yno tyjater. Ale sōm i tacy, co do środka lezōm. Tela yno, że masa tekli tam łazi i sie potym synki bydōm musieli w chałpie tuplikować.
U
No ja, ale ich unfal to ni ma nasza utropa.
V
Pora nocy ich czeko z van Goghiym abo w Vondel Parku. Jak se tak spōminōmy te place – szło trefić gorzyj.
W
Te, absztyfikant, dalij wajosz? Dej już pokōj. Poprow wela, kup se wōszt abo frytki. Nojlepij na tym lilowym sztandzie. Zaro Ci bydzie lepij. I idź wieczōr na wander, yno uważej cobyś wcirōw niy dostoł, bo trza bydzie po waleska zwōnić.
Y
Przepōmnij o yntach do holynderskich kanałōw!
W
Zmaściłeś dzisioj sprawa, bōłeś zawalaty, ale Amsterdam mosz zwiydzōny. Jutro zaś je dziyń. Wiyncyj już umisz, tōż bydzie dobrze. Co Ci radzymy na nastympne zolyty? Zamtowy binder, załośniczki dlo freli i mono jako zista? I chopie – abo zoki, abo zandale, okej?
