Amsterdam – nojbardzij hyrskie miasto we Niderlandach. Dzisioj pokożymy Wōm tyn plac trocha inkszyj jak wdycki, bo bez… zolyty! Niy nasze, yno ogōlnie – pora doradōw jako karlus mo wszyjsko narychtować, coby dziołcha bōła rada i ôstoła ôd niego lipstōm. Zaro chycicie idyjo. I nauczycie sie masy nowych wortōw. (Bildy niy majōm wiela spōlnego z tekstym, tōż niy sznupejcie czasym za tymi nowymi wyrazami po ôbrozkach.)
A
Zolyty w Amsterdamie to ni ma bele co. Absztyfikant ôblecze se ancug, coby niy wyglōndać jak jako afa. Może sie potym leko aufryjgować, bo wszyjscy tam majōm farebne koszulki, ale przeca dziołcha może prziś na abzacu! Tōż niy rōb synek gańby i weź se jeszcze do kapsy pora amolokōw.
B
Galoty z bizami, gynał z bigla i do tego binder. Dej pozōr na babrokōw przi beszōngu!
C
Jak sie już treficie, to wejrzij jaki mo cycynhalter! chyć sie roboty. Yno niy bier baby do coffeeshopu! Być chop i trzimej jōm daleko ôd cygaretōw. Idźcie dalij, mono przi drōdze kery Wōm zagro na cyji.
D
Downij szło dotachać deka nad kanał i tam se szło duldać wino. Tera dziołchy trza brać kajś indzij. Kaj?
E
Pytanie ‘kaj?’ to je tera esync kożdych zolyt. Kaj w Holandii zjeś epne golōno? Kaj za ekiym idzie se fajnie zicnyć? I nojgorsze… “kaj robisz?” – “je żech elwer“…
F
Pamiyntej – jak Ci sie trefi ôtwiyrać flaszka, to dej pozōr na frōp. I niy fandzol.
G
Bez Amsterdam ni ma co gzuć. Tōż niy kōmbinuj z rajzōm na gypku (chocioż kołōw tam je w pierōny), yno zrōbcie se szpacyr. Gyszynk, jak na gyburstag, to tyż dobro idyja. Niy wiysz co kupić? Znojdź jakie gryfne glazyjki. Żodnej gorzoły!
H
Holandia – myślisz se – to alkohol sie mo loć? Niy bydź gupi. Je tam pora imprezowych szteli, ale przijyżdżajōm tyż cołkie familije, tōż trza sie sprawować. Hut na łepie i halba w rynce? A chcesz coby dostała hercklekotōw? Abo i zaro hercszlagu? Inno sprawa, że choby yno trocha sie napijesz, to bydzie Ci sie hepać abo i zaczniesz szukać haźla, coby heftować. Żodno Cie niy bydzie halała, a o hajtaniu to już w ogōle zapōmnij!
I
Z dziołchōm do izby pōdzie inkszy…
J
Jak dziołcha skuli zimna zacznie jamrać “jezderkusie! juzać żech se yno jakla wziyna!”, to jōm ôgrzyj, bo Ci tam zamarznie. I pochwol jōm za ta piykno ôblyczka!
K
Kabot symnij, tyż dej freli. Boroka w samej kiecce łazi na isto. Myślała, że w maju bydzie co cieplij, a tam +12oC i same mrokwie. A jak jij tyn kabot dowosz, to niy śmisz jij kilać! Chyba, że chcesz mieć krōmflek na kroku… Być fajny karlus!
L
Dobra, nazot, do kōnkretōw. Nimaś leber ani leluja, tōż mosz jakieś szanse. Pōmału kludź dziołszka drōgami Amsterdamu. Niy zahoczcie o jako linkera. Wejrzij na baba, mo fajny lajbik lipynsztift? Jak ja, to już je połek sukcesu.
Tajla drugo – Amsterdam: ôd M do Z
