Dwa miesiōnce pomiyszkiwanio we Lizbonie to je i mało, i moc ôroz.
Mało, bo nikyj niy znojdzie sie zatela czasu, coby ôboczyć kożdo drōga (okej, to sie jeszcze do zrobić) abo kafyj (niy do zrobiynia, forgot). Mało, bo pora razy wykamani cołkim tydniym roboty smolilimy już Bairro Alto. Mało, bo chybło nōm czasu i na ślimoki, i na nastympne zorty bacalhau.
Moc beztōż, że po dwōch tydniach niy zoziyro sie już na miasto jak turysta. Sztyjc my sōm radzi, że wele nos wszyjsko take gryfne, ale po jakimś czasie widzymy tyż te małe minusiki, kere pokozujōm sie yno miyszkańcōm. Abfale, psie kupy, trowa we parku do pasa… W rajzie na pora/poranoście dni niy do ujzdrzynio.
Belém – jadymy!
Dobra, kōnkret – coby sztyjc być rychtyk rajzowiczym/turystōm/eksploratorym (roztomaicie ludzie tera mianujōm samych siebie) ajnfach zwiydzalimy. Dziylnica po dziylnicy, jedna drōga po drugij, bai muzea. Widzielimy, czulimy i zjedlimy rychtyk fol. Nasze zwiydzanie Lizbōny sprōbujymy streścić trocha lepij niż tyn wstymp 😉 Na poczōntek czynść pokazowo, historyczno, gynał ze szkartki pocztowej. Witejcie w Belém!
Z głōwnej bany Z jednej z głównych banōw w Lizbōnie – Cais do Sodré – do stacji Belém dojadymy w 8 minut, farkarta w jedna zajta kosztuje 1.85€. Tōż tera ôboczcie co idzie zwiydzić za niycałe 2€.
Torre de Belém
Jedna z nojwiynkszych, nojbardzij znanych, tōż i nojchyntnij nawiydzanych atrakcji w Lizbōnie. Kedyś nojważniyjsze stawiynie militarne w stolicy Portugalii. Miała cwilingra na drugij zajcie Tagu, ale zostało po nim yno pora kamiyni – tak nōm pedzioł muzealny przewodnik. Po jakimś czasie Torre de Belém przerobili na cuchthauz. Kwatyrnicy na nojniższych sztokach zemiyrali skiż przipływōw.
Zwiydzać w środku idzie w kożdy dziyń za 6€. W piyrszo nidziela w miysiōncu za fraj. Sztudynci mogōm kōmbinować ze szkryflaniym maili – co i jak znojdziecie tukej: www.torrebelem.pt.
Mosteiro dos Jerónimos
Inakszyj: Klasztor Hieronimitōw. Ôgrōmne stawiynie, ô kerym godo sie, że je misztrzostwym stylu manuelińskigo – taki miks renesansu i gotyku. Kuknijcie yno na rzeźbiynia na óbkoło dźwiyrzy, gynialne sōm! Kościōł przi klasztorze idzie zwiydzać za fraj, reszta za 10€.
To gynau we Mosteiro dos Jerónimos pochowany je m.in. Vasco da Gama i to tukej podpisywany bōł fest wożny europejski papiōr – tzw. Traktat Lizbōński.
Padrão dos Descobrimentos – Pōmnik Ôdkrywcōw
52 metry do wiyrchu i szwarny landszaft za 2€ dlo sztudyntōw i za 4€ dlo reszty. Pōmnik z ważnymi postaciami z czasōw wielich ôdkryć geograficznych – m.in. Vasco, Magellana, Albuquerque i Hynia Żyglorza. Szprytnie wciepany krziż i piykno mozaika przi pōmniku – gyszynk ôd RPA. A to wszyjsko niy tak downo, bo budowla je młodo – prowizorka postawili w 1940 skuli portugalskij wystawy światowej, a dokōńczyli jōm 20 lat niyskorzij.
CCB – Centro Cultural de Belém
Centro Cultural de Belém – 140 tysiyncy m2 zagospodarowane na sale kōnfyryncyjne, aussztelungowe, plac, w kerym pokazujōm szauszpile jak balet czy opera, muzeum i… zygroda z drzewkami oliwnymi. Stawiyniy z dworu wyglōndo surowo, ale i tak sie ô nim pamiynto.
Praça do Império
Kwadrat 280x280m z wielōm fontannōm w strzodku. Idyalnie pasujōm do sia z klasztorym. Tyn kōnsek placu mo być pamiōntkōm Portugalskigo Imperium Kolōnialnego. Tyż postawili go w 1940 skiż Exhibition of the Portuguese World. Jedyn z nojwiynkszych skwerōw w Europie i lider w tyj kategorii na Pōłwyspie Iberyjskim.
Pastéis de Belém
Jak smakuje land? Polska pierogami, Włochy pizzōm, Ślōnsk roladōm, Niymcy kebabym wusztym, a Portugalijo? Yno Pastéis de Nata. Sztyjc gorki krym pudingowy w tartaletce z francuskigo ciasta. Nojlepsze sōm te w Unica Fábrica dos Pastéis de Belém. Sprzeduje sie ich tam 6 milionōw w rok. Rekord to 55 tysiyncy sprzedanych ciostek na dziyń. Pytania?
A ja – jedna “babeczka” to 1.05€ mynij w kapsie i kole 300kcal wiyncyj w brzuchu. (Zjydzcie ze piynć, ale potym do cyntrum już polećcie. Trzi razy. W ôbie zajty.)
[Matis]
PS. Przi jedzyniu Pastéis de Belém dobrze je mieć kole siebie swojigo nojlepszego kamrata z czasōw gimnazjum i liceum. Tōż żech se go ściōngnoł do portugalskij stolicy gynał z hiszpańskigo Santiago 😉
