Kaj idze ôroz zaliczyć dwie nojwiynksze atrakcje Rio de Janeiro i San Francisco? Yno w Almadzie – mieście na drugij zajcie Tagu, jak sie wejrzi ôd Lizbōny.
Almada – miasto podrōbek?
Przijyżdżocie do stolicy Portugalii i idziecie se cyknyć zdjyncie przi rzyce. Po drōdze siedym razy chcōm Wōm sprzedać dragi i jedynoście razy bryle. Dołazicie do kraju, tōnkocie szłapa we wodzie, dźwigocie łep, a tam – brazylijski Cristo Redentor i amerykōński Golden Gate Bridge.
Gibcyj abo niyskorzyj musicie sie wybrać za rzyka. Jak już wiycie, Lizbōna je fest gryfno, tōż dobrze je wejrzeć na nia tyż z inkszej zajty. Coby to zrobić, musicie ôbrać: szif, auto abo bus. Idzie tyż cugiym (ale ni mo to wiynkszego synsu), ale niy idzie piechty.
Ponte 25 de Abril
Most 25. Kwiytnia mo przeszło 2 kilometry na dugość i 2 poziōmy do rajzy – autostrada na wiyrchu i tory na dole – beztōż niy idzie se po nim poszpacyrować. Miano sie wziyno ôd daty Nelkowej Rewolucji (Revolução dos Cravos) z 1974r.
Cristo Rei
Coby stanōnć pod pōmnikiym Chrystusa Krōla (Cristo Rei), trza sie kōnsek przynś. Dobra, jak kukniecie na Google Maps to uwidzicie, że idzie tyż podjechać metrym. Ale jak pōdziecie piechty, to miniecie piykny park z mega landszaftym, klimatyczne chałpki z gryfnymi dźwiyrzami i fajne mikro-cyntrum tej wsi (w kerej je metro). Treficie tyż ôżartych kibicōw Bynfiki 😉
Okej, wlyźlimy. Włażymy do kościoła, kery je podstawōm rzeźby. Na lewo kasa – 7€ do automatu, ajntryt do ôkiynka. Jeszcze yno chwila w raji i aufcugiym na sōm wiyrch. 28-metrowy Jezus ze ślypiami na Lizbōna je zaro kole nos.
Co widzymy? Wiadōmo – most, miasto, rzyka. Ale sōm tyż dwie inksze tajle tego landszaftu, kere sie nōm ciepły w ôczy.
Piyrszo, to figura Maryi. Niy znōmy sie na kōnszcie, a ô gustach sie niy dysputyruje, ale… stawiōmy nojwiynkszo pizza tymu, kery nos przepre, że tymu rychtyk keryś umi przajać! No wejrzijcie sami…
Drugo rzecz – bioły celt na kraju klifu. Dwiesta ludzi na weselu. Naprowda, jak z bojki 😉
Fraj sobota abo nidziela to idealno przileżytość na wycieczka do Almady. Zapakujcie flaszka wody i szokulada do rukzaka, a 3€ (na szif tam a nazot) do kapsy. Tako cyna za miks Stanōw i Brazylii rychtych sie werci!
