bele kaj Italijo Neapol: co to sie tukej podzioło?

Neapol: co to sie tukej podzioło?

04.09.2016
Neapol, Włochy, bele kaj, blog po śląsku

Jak kery kuko na nasza zajta na Facebooku, tyn wiy, że Neapol je ôd jakigoś czasu dlo nos jednym z nojwożniyjszych miast na świecie. Ja kamraty – ôd byzuchu w mieście, w kerym wyônaczyli piyrszo pizza, ô Julii idzie godać „lipsta”, a ô Matisie „szac”. Ale Neapolowi przajymy niy yno skuli naszych zrynkowin :)

Neapol, Włochy, bele kaj, blog po śląskuNeapol, Włochy, bele kaj, blog po śląsku

W Neapolu bylimy już drugi roz. Przōdzij, we październiku 2015, zajechalimy z bracikiym ôd Julie – Wiktorym i z ôd niego frelōm – Agōm. Tak sie nōm podobało, że na Godne Świynta kupilimy naszym ôjcōm farkarty na fliger do Italiji i padalimy, że muszōm w kōńcu kajś z nami porajzować i wejrzeć na take piykne miasto.

Neapol, Włochy, bele kaj, blog po śląsku

Transport Ślōnsk-Neapol

Wizzair sprzeduje bilety z Katowic w roztōmaitych cynach. Niy mogymy napisać, wiela my dali, bo to były gyszynki, ale normalnie jak jedzie dwōch ludzi, to jak tam a nazot zabulicie kole 170zł za łep, to to je dobro cyna. Wyloty i prziloty sōm we środy i nidziele, tōż my zorganizowali se ta rajza na piynć dni (trza yno trzi dni urlopu).

Neapol, Włochy, bele kaj, blog po śląsku

Na flughawyna do Katowic nojlepij zajechać autym i je zaparkować na kerymś parkingu w Pyrzowicach – za dziyń bierōm kole 5zł. My wdycki stowōmy na placu “Parking Guard“. Autobusym my jeszcze tam niy jechali.

Ze lotniska w Neapolu do miasta ni ma daleko, bo yno kole 4km. Na forach internetowych ludzie piszōm, że przi fajnej pogodzie łażōm piechty i w 50 minut sōm w „cyntrum”. Idzie tyż utorżyć taryfa za 12-16€. My, skuli wygody wszyjskich siedmiu ludzi, wziyni Alibus za 3€ od łepka. Na Piazza Garibaldi przi głōwnej banie jedzie sie kole 20 minut.

Neapol, Włochy, bele kaj, blog po śląsku

Spanie w Neapolu

Przi naszyj grupce – dwie mutry, dwōch fatrōw, jedyn brat i my – ani my niy szukali spania na couchsurfingu. Zarezerwowalimy se cołkie miyszkanie (sypialka, wielko izba z kuchniōm, łaziynka i antrysola) na airbnb. Za cztyry nocki wyszło 185zł/łep, tōż kole 11€/noc. Do Piazza Garibaldi piechty 10 minut, do Quatro Spagnioli 20 minut, a do sklepu z piwym rybnego 20 sekund ;)

Neapol, Włochy, bele kaj, blog po śląsku

Co my widzieli, co my robili?

Bez sztyry fol dni udało nōm sie zrobić, pokosztować i zoboczyć mocka dingsōw:

  • zjedlimy rychtyczno neapolitańsko pizza w pizzerii Del Popolo i masa roztōmaitych maszketōw w trattoriach Nennella i Antica Capri,

Neapol, Włochy, bele kaj, blog po śląskuNeapol, Włochy, bele kaj, blog po śląsku

  • przeszlimy 20 kilometrōw drōg Neapolu z masōm piyknych kościołōw i kapliczek,

Neapol, Włochy, bele kaj, blog po śląsku

  • uwarzylimy pora kilo małżōw i nudli w dōma, a potym poprawili nojlepszymi włoskimi ciostkami, kołoczykami i zistami,

Neapol, Włochy, bele kaj, blog po śląsku

  • wypilimy ze 20 flaszek szklōnek kieliszkōw wina,

Neapol, Włochy, bele kaj, blog po śląsku

  • ôbejrzelimy ôdkopane z wulkanicznych hasi Pōmpeje i Herkulanum,

Neapol, Włochy, bele kaj, blog po śląskuNeapol, Włochy, bele kaj, blog po śląskuNeapol, Włochy, bele kaj, blog po śląsku

  • powōnialimy wulkanu Pozzuoli Solfatara, kery capi jaki zgnite jajca, ale zmocnio potyncja,

Neapol, Włochy, bele kaj, blog po śląskuNeapol, Włochy, bele kaj, blog po śląsku

  • pozaglōndalimy na miasto ôd wiyrchu, z gōrki Montesanto.

Neapol, Włochy, bele kaj, blog po śląsku

A ku tymu utorżylimy pochefyjek na mobilniok, rozprowialimy po włosko-angielsko-nimiecku, przeszlimy bez katakumby, zōmki i bōnte torgi, ôbskoczylimy cołki stadiōn SSC Napoli i mielimy przi tym wszyjskim maaasa uciechy! :)

Neapol, Włochy, bele kaj, blog po śląskuNeapol, Włochy, bele kaj, blog po śląskuNeapol, Włochy, bele kaj, blog po śląskuNeapol, Włochy, bele kaj, blog po śląsku

Neapolitański miszōng

Jak bydziecie w Neapolu bez trzi pełne dni, to kupcie se artecard. Za 32€ mocie bez tyn czos przejazdy autbusami, cugami i kolejkami bez limitu, dwa ajntryty do wybranych szteli za darmo i 50% upustu na reszta atrakcyji. Je tyż opcja za 25€ dlo ludzi, kerzi majōm miyndzy 18 a 25 lot. Bajtlōm przed ôśminostkōm ni ma co kupować, bo bambini i tak majōm mocka ajntrytōw za fraj.

Neapol, Włochy, bele kaj, blog po śląsku

Kochbuch – przepis na mule po marynarsku: kilo małżōw, 100ml biołego wina, dwie łyżki masła, pōł cebuli i pietruszka. Wszyjsko warzić aż pobulko i sie muszle poôtwiyrajōm. Spamiyntejcie – mule majōm być zawarte przed i ôdewrzite po warzyniu. Jak je inakszyj – wyciepać.

Neapol, Włochy, bele kaj, blog po śląsku

Pogoda w Neapolu w marcu? Smolcie wszyjskie prognozy, bo i tak w dziyń, kedy mo padać, bydzie grzoło. Wiymy co godōmy – sprawdzilimy!

Neapol, Włochy, bele kaj, blog po śląsku

Jak kery lubi snōżne, ôdpicowane i do tego spokojne miasta, to lepij niech se do pokōj z włoskim Napoli. Sztyjc ryk i titanie aut, abfyjle na sztrekach (ale bez przesady), ôbdropane chałpy i mopliki – masa moplikōw, wszyndzie mopliki! Na pasach, na borsztajnach, na drōgach, na schodach – wszyndzie, forgot! Ale jak dlo nos, to gynał tak wyglōndajōm Włochy i ta południowo tajla sie nōm fest podobo.

Neapol, Włochy, bele kaj, blog po śląskuNeapol, Włochy, bele kaj, blog po śląsku

Werci sie

I na kōniec – Neapol je tōni. I niy dejcie se pedzieć, że tak ni ma. Idzie tam udać pijōndze, jasno sprawa, ale jak porōwnocie z inkszymi miastami, w kerych cyny sōm w ojro, to zoboczycie, że finansowo lepszej rajzy jak do Napoli to niy idzie ôbrać.

Neapol, Włochy, bele kaj, blog po śląsku

Te miasto rychtyk żyje. To trocha jak z frelamiprzaje sie i Rzymowi, i Floryncji, i Neapolowi, yno skuli inkszych cech. Tym piyrszym dwōm skuli tego, że sōm sztyjc wyszykowane, piykne i ni ma gańby ich pokozać kamratōm w ancugach. Yno że to Neapol sie śni po nocach, bo to je ta frela szczero, żywo, w kerej je fol emocji, a i szpetno ni ma ;)

Neapol, Włochy, bele kaj, blog po śląsku

PS. Mamo! Tato! Młody! Dziynki za rajza! :)

Neapol, Włochy, bele kaj, blog po śląsku

inksze udane teksty: