Bayern Mōnachium to je wizytōwka miasta, a stadiōn Allianz Aryna to je jedna ze nojwożniyjszych tajli kożdego byzuchu na Bajerach. Miyszkōmy we Mōnachium już przeszło dziesiynć miesiyncy, a sztyjc niy bylimy społym na fusbalowym szpilu. Do wczora!

Lepszyj przileżytości do nawiedzynio Allianz Aryny niy szło trefić. Audi Cup to je turniyj dlo sztyrech ferajnōw, ôdprowiany ôd poru lot gynau przed napoczynciym sezōnu we nojlepszych europejskich ligach. Na szpile we 2017 roku ajnladōngi ôd FCB zebrały italijskie Napoli, szpanijskie Atletico i angielski Liverpool. Turniyj idzie bez 2 dni, a kożdy dziyń idzie pozaglōndać na dwa szpile z godzinnōm pauzōm miyndzi nimi. Terozki bōła piōnto edycyjo, przōdzij 3 razy wygrywoł Bayern i roz FC Barcelōna.

Fto fusbalowi przaje, tyn na isto zaglōndoł na Audi Cup już wczora we telewizorze. Tōż my ô samych szpilach szrajbnymy yno krōtko na szlag, a dalij pokożymy Wōm, jako wyglōndo byzuch na mōnachijskim stadiōnie “ôd kuchnie” – jako to narychtować, wiela co kosztuje i eli werci sie tamek wybrać. Chopy – czytejcie, bo dzisioj szkryflōmy ô fusbalu na nojsrogszym poziōmie. Baby – czytejcie, bo mocie samek akuratnie wytuplikowane jako załatwić szacowi jedyn ze nojlepszych gyszynkōw w życiu.

Szpil nr 1: Atletico Madryt – SSC Napoli

Już po piyrszym szpilu szło spokopić, że chocioż to je turniyj kamracki, to żodyn samek nogi niy ôdstowi. Dwie ferajny tak mocne, że kożdej gańba było przegrać, a ôkrōm tego żodyn fusbaler niy ma tamek pewny placu we piyrszej jedynostce, tōż walka je bōła naprowda na maksa. Nojlepij widać to po szkartkach, bo ôźmiu żōłtych i jednej czerwōnej sie czynsto we takich meczach niy widzi.

Julia pedziała, że jij sie niy mierzło, a to już godo same przez sie, jak zwiedowny bōł tyn szpil. Masa fajnych akcyji, sztrzałōw i parad tōrmańskich. Chocioż we piyrszym pōłku niy było ani jednej tōry, to na szpilplacu dzioło sie fol i mecz zlecioł naprowda gibko. We drugij tajli sztrzylanie napoczōł cudnie Callejon, ale za 25 minut już wygrywało Atletico po golach Torresa i Vietto.

Na trybunach ludzie we roztōmaitych treskach, ale nojwiyncyj bōło farby czerwōnej – fanōw Bayernu i Liverpoolu (!) przilazło na Allianz Aryna naprowda fol. Beztōż dycht cołki stadiōn bōł uradowany po kożdej tōrze – eli dlo Atleti, eli dlo Napoli. Ftoś powiy, że my sōm “pikniki”, ale ze takimi ludziami naôkoło zaglōndo sie na szpil naprowda superowo. Nojlepszo bōła raja kibicōw przed nami – nojprzōd “Forza Napoli!“, a za pora minut “Atleti, Atleti!“. Mielimy richtich szpas.

A! Bōł tyż ślōnski akcynt, bo we Napoli ôd poczōntku lotoł Arek Milik, synek ze Tychōw. Pora razy fajnie zagroł, ale wyglōndoł na wykamanego rychtōnkiym do sezōnu. No i niy trefił z elwra – sztrzelił bai niy tak źle, ale superowo wyczuł go Oblak (kery ôstoł potym nojlepszym fusbalerym meczu).

Atlético Madryt – SSC Napoli 2:1

Tōry: Torres, Vietto – Callejon

Atlético: Oblak – Juanfran (Vrsaljko), Godin, Savić (Kranevitter), Filipe Luis (Gimenez) – Gabi (Vietto), Koke, Gaitan (Thomas), Carrasco – Griezmann (Lucas), Torres (Correa)

Napoli: Reina – Hysaj (Maggio), Albiol (Koulibaly), Chiriches (Maksimović), Ghoulam (Rui) – Allan (Rog), Hamsik (Zieliński), Jorginho (Diawara) – Callejon (Ounas), Milik (Mertens), Insigne (Giaccherini)

PS. ôd Julie dlo babōw: Pepe Reina i Fernando Torres to sōm naprowda szwarne karlusy!

Szpil nr 2: FC Bayern Mōnachium – FC Liverpool

Stadiōn tak richtich nafolowoł sie kapka po ôsmej. Coroz bliżyj szpilu ôblubiōnego Bayernu, coroz bardzij uradowani fani. Masa piw ze plastikowych becherkōw już wysłeptanych, tōż przi śpiywaniu hymnu FCB przed grzociym sie, żodyn sie niy gańbił ani trocha. Przeszło 50 tysiyncy chyrtōni wyryczało nojprzōd “FC Bayern Deutscher Meister” (Stern des Südens), a potym wroz ze angielskimi kamratami “You’ll never walk alone“. Mega!

Zawodnikōw, kerzi wylecieli sie grzoć, prziwitała szudera braw. A i ôni zachowali sie richtich fajnie – podlecieli do sektorōw, pokiwali i podziynkowali. Zaro potym do bali. Dlo kożdego, fto kedyś szpiloł we A, B abo C klasie, mōm dobre info – poczōntek grzocio sie we Waszych klubach i we Bayernie je gynau taki sōm! Kożdy biere bal, robi “triki”, zakłodo “sita” i loce bele kaj. Co trzeci pucuje sztrzewiki, co piōnty poprawio frizura. Standard, fto groł, tyn spokopi. Yno ci z Bayernu na prōzno tōra niy walōm, ale możnej jeszcze niy wiedzōm, że nojlepszo rozgrzywka to szlag z “całej pety”, z piynciu metrōw, bez tōrmana. 😁

Drugi szpil jednako zwiedowny, jak piyrszy, yno rōżnica miyndzy ferajnami wiynkszo. Friszny, gibki i dynamiczny Liverpool skasyrowoł Bayern, kery wyglōndoł wczora niy jak Audi, a jak stary Wartburg. Widać, że fusbalery ôd Ancelottigo sōm wykamani rychtowaniym do Bundesligi, ale ôd Bayernu zawdy bydzie sie ôbczakować wiyncyj. No a Liverpool? Fertich na sezōn, a ze takōm kadrōm i takimi krzidłami umiōm we tym roku namiyszać. To, co grajōm Salah, Mane i Moreno na bokach to je miazga.

Bayern Mōnachium – Liverpool FC 0:3

Tōry: Mane, Salah, Sturridge

Bayern Mōnachium: Ulreich – Rafinha, Javi Martinez, Hummels, Alaba (Friedl) – Thiago Alcantara (Renato Sanches), Tolisso (Vidal) – Mueller, James Rodriguez (Coman), Ribery – Lewandowski

Liverpool FC: Karius – Alexander-Arnold (Flanagan), Lovren, Matip (Klavan), Moreno – Henderson (Sturridge, Solanke), Can (Wijnaldum) – Mane (Lallana), Coutinho (Woodburn), Salah (Grujić) – Firmino (Kent)

PS. ôd Julie dlo babōw: żodnego szwarnego synka na szpilplacu we tym meczu!

Ajntryty na Audi Cup 2017

Ajntryty pokupowalimy bez interneca. Na zajcie Bayernu trza sie yno zaregiystyrować, ôbrać na kery dziyń scecie bilety i kaj bydziecie zicać. My wziyni nojtōńsze ajntryty, takie po 35€. Godo sie, że im bliżyj szpilplacu, tym lepij i beztōż place na wiyrchu sōm nojtōńsze. Jo tam richtich lubia kukać na szpil z wiyrchu, a Julie było wszyjsko jedno, tōż ôbralimy ôpcyjo ekōnōmiczno. Bilety drukujecie sami w dōma abo ôbsztelujecie, coby Wōm posłali (wtynczos pora ojro wiyncyj, no i trza pryndzyj kupować, coby prziszły przi czasie).

Na szpile Bayernu we Bundeslidze szanse na kupiynie ajntrytōw bez bycia we klubie kibica sōm praktycznie niymożliwe, bo na kożdym (!) meczu je kōmplet ludzi – przeszło 75k! Potym idzie już kupować yno ôd “biznesmynōw” pod stadiōnym, ale to ni ma do kōńca lygalne. Beztōż Audi Cup je echt super – mocne ferajny, gryfny stadiōn i tōnie bilety, kere idzie normalnie kupić.

Dojazd na Allianz Aryna

Regiyrōnek Mōnachium to żodne gupieloki, tōż bez lata granio Bayernu nauczyli sie jako wszyjsko ôrganizować we dziyń meczu. Audi Cup je wyjōntkowy, bo fest rzodko sie trefio, coby szpil na Allianz Arynie bōł we wtorek i strzoda ôd 17:45. Skirz tego na nojwożniyjszych stacyjach metra je fol bedinerōw, kerzi pōmōgajōm, wachujōm i ryczōm na ôżartych kibicōw.

My jechali ze samego cyntrum miasta, ze Marienplatzu. Presa we bance bōła tako, że ledwo szło dychać, ale jakoś my dojechali. My i – jak sie potym ôkozało – przeszło 57 tauzynōw inkszych ludzi. Na stadiōn ciśnie yno metro U6 (modro kryska na mapkach), wysiodocie na przistanku Fröttmaning – tam, kaj wylazujōm wszyjscy i tam, kaj przi mianie sztacyji je namalowany fusbal.

Włażynie na stadiōn

Ludzi ôd grōma, tōż zawdy lepij wybrać sie na szpile kapka pryndzyj. Ôd banki idzie sie jeszcze 15 minut (po drōdze ludzie bydōm przedować ajntryty). Potym bydzie stoł chop, kery przistawi Wōm do taszy abo rukzaka prostokōnt wieli jak szkartka A4 i abo pokiwie, że śmicie ciś dalij, abo koże Wōm ôstawić tasze we depozycie (bodej 2€ ôd sztuki).

Dalij umicie iś abo dołym, abo wiyrchym. Na dole sōm kasy. Tamek idźcie yno, jak niy mocie biletōw, abo jak planujecie pojeś na stadiōnie. Przi tej drugij ôpcyji musicie stanyć we raji, kaj bydzie napisane “ArenaCard”. We ôkiynku godocie, że scecie karta i za wiela scecie jōm nafolować (min. 10€). Pod spodkiym mocie cyny jodła i napowkōw, tōż spokopicie wiela Wōm trza.

Na tōrach Wos wymacajōm ôd wiyrchu ku dołowi i pozaglōndajōm do kapsōw i rukzakōw. Niy śmicie wnosić żodnych napowkōw. Jedne, co idzie wyōnaczyć, to mieć przi sia prōzno flaszka (max. 0.5l), kero potym umicie se nafolować wodōm na stadiōnie (bez gańby, we Nimcach dycht kożdy pije “kranōwa”, tōż folowanie flaszek we haźlu je dlo nich ganc normalne). Pokazujecie ajntryt i yntlich przełazicie. Czejś, sōm żeście na Allianz Aryna!

Jodło, napowki i zakupy na Allianz Arynie

Jak już wlyźliście, znojdliście swōj sektor, a nojlepij i raja, i zic, a mocie głōd, to umicie cosik pomaszkecić. Na tym, gynau przi turnieju takim jak Audi Cup, kaj siedzi sie na stadiōnie w sumie 5 godzin, Bayern robi fest dobry interes. Chocioż co je fajne, to to, że niy ma tamek tak srogij rōżnicy miyndzy cynami na stadiōnie, a kajś we mieście.

Piwo za 4.4€ i frytki po 3.5€ to nasze ôblubiōne menu. Ale sōm i precle, hot-dogi, nuggetsy. Ale na spōmnianej ArenaCard 20€ na dwōch ludzi raczyj starczy.

A i musicie wiedzieć, że Nimce przajōm kupowaniu na stadiōnie. Roz, że wiedzōm, że ôd nich kasa idzie na ôd nich klub i dwa, że majōm co udować, tōż kupujōm pełne tasze. Na plecach “Lewandowski 9”? No ale przeca jako to tak bez “James 11” terozki?! Raje do jodła, piwa i wszyjskich pierdōłek klubowych sōm mega dugie, ôd godziny przed meczym, do ôd nigo kōńca, ale i je w czym ôbiyrać, tōż szporujcie zawczasu.

Ciście na Allianz Aryna we Mōnachium!

Chocioż we drugim meczu Audi Cup mōnachijski Bayern przegroł, to atmosfera na stadiōnie bōła do samiuśkigo kōńca superowo. I bai jak trza było we dyszczu ciś na metro, a w nim zaś sie tulić ze rubym Italianerym we modrej koszulce slim-fit (kery wyglōndoł gynau jak Arnlod Boczek ze “Kiepskich”!), to uśmiychy nōm z gymbōw niy slazowały.

Super przigoda! – tak pedziała w dōma Julia i niech to bydzie nojlepszōm recynzyjōm byzuchu na Allianz Arynie.

PS. Dziynki Julcia!!! 😘

Nawciepuj nōm skirz tego tekstu tukej: na FB! Kōmyntowanie je fajne!